Новости
Бөрйәндә "Урал батыр уты" ҡабынды
Ошо көндәрҙә Бөрйән районында бығаса булмаған ҙур мәҙәни сара үтеүе, төҙөкләндереүҙән һуң заман талаптарына яуап биргән район мәҙәниәт һарайы сәхнәһендә “Урал батыр уты” фестиваленең башланғыс алыуы хаҡында матбуғат саралары хәбәр итте.
Райондың “Таң” гәзитенән Таңһылыу Баһауетдинова белдереүенсә, әлегеләй сараны бығаса төбәк халҡы күрмәгән: данлыҡлы "Арғымаҡ", "Дәрүишхан", "Тархан", "Бүреләр" төркөмдәре, Башҡортостан Милли симфоник оркестры, Өфө, Сибай, Учалы филармониялары артистары – барыһы ла Бөрйән сәхнәһендә сығыш яһаған.
“Сәхнәләге яҡтылыҡ эффекттары, сәнғәт оҫталарының рух менән һуғарылған дәртле сығыштары, үҙебеҙҙең Бөрйән егет-ҡыҙҙарының да ошо сараны биҙәп сәхнәгә сығыуы – барыһы ла һоҡландырҙы халыҡты. Сарала Башҡортостандың мәҙәниәт министры, яҡташыбыҙ Әминә Шафиҡованың да ҡатнашып, “Мин – Бөрйән ҡыҙы!” тип сығыш яһауы байрамға мәртәбә, йылылыҡ өҫтәне”, – тип яҙа “Таң” гәзите.
Әйткәндәй, Әминә Шафиҡова урындағы бер төркөм мәҙәниәт хеҙмәткәрҙәренә республиканың Рәхмәт хаттарын да тапшырған.
Был сағыу ваҡиғаға ҡарата танылған сәнғәт оҫтаһы, башҡорт бейеүенең күркәмлеген Башҡортостанда ғына түгел, бөтә Рәсәйҙә танытып йөрөүсе һәләтле замандашыбыҙ Миләүшә Хәйбуллина ла фекерен белдергән. Социаль селтәрҙәге шәхси сәхифәһендә ул былай тип яҙа: "Бөрйәндә тарихи ваҡиға булды – “Урал батыр уты” фестивале старт алды. Ул ошо бәрәкәтле ерҙә башланғыс алып, артабан оло юлға сығасаҡ! Урал батыр уты йөрәктәрҙән йөрәктәргә, күңелдәрҙән күңелдәргә күсеп, милләтебеҙгә бәрәкәт, ҡот өҫтәһен! Ойоштороусыларға ҙур рәхмәт!" Миләүшә сәхнәләштерелгән тамашала “Урал батыр” эпосынан Һомай ролен башҡарған.
Бөрйән халҡы мәҙәни сараны бик йылы ҡабул иткән, тамашаны ҡарарға тотош ғаиләләре менән килгән, ғөмүмән, мәҙәниәт йортонда алма төшөрлөк тә урын булмаған.
