Новости

«Мираҫ» йыр һәм бейеү фольклор ансамбле артистары маҡтаулы исемдәр алды

Өфөлә «Мираҫ» йыр һәм бейеү фольклор ансамбленең ҙур концерты үтте. Өфө ҡалаһы хакимиәте башлығы Өлфәт Мостафин «Мираҫ»ты баш ҡаланың визит карточкаһы тип атаны һәм ансамбль Бөтә донъя фольклориадаһында Өфөнө лайыҡлы күрһәтер тигән ышанысын белдерҙе.

Муниципалитет башлығы артистарға ҡунаҡҡа буш ҡул менән килмәгәйне: юғары һөнәри оҫталыҡтары һәм сәнғәтте үҫтереүгә ҙур өлөш индергәндәре өсөн коллектив хеҙмәткәрҙәре маҡтаулы исемдәр алды. Әйтәйек, «Мираҫ» ансамбленең баш балетмейстеры Әлфиә Тимерғәзиева «Башҡортостан Республикаһының халыҡ артисы» исеменә лайыҡ булды.

Солист Алёна Завьялова, хор артистары Ирина Ғималетдинова, Гөлнара Миңлеғолова, Артур Ҡадиров, балет артистары Гөлмирә Мамедова, Рәмил Мостафин, Елена Надсадина, Марат Солтанов «Башҡортостан Республикаһының атҡаҙанған артисы» исемдәрен алды. «Мираҫ» ансамбленең музыкаль етәксеһе Сергей Гориченскийға «Башҡортостан Республикаһының атҡаҙанған сәнғәт эшмәкәре» тигән маҡтаулы исем бирелде.

Тантаналы өлөштән һуң тамашасыларҙы өс сәғәткә илдәр һәм ҡитғалар буйлап сәйәхәткә алып сыҡҡан «Донъя тирәләй» тигән сағыу шоу башланды. Башҡорт, татар, рус көйҙәренән башланған программа артабан Абхазия, Төркиә, Италия, Аргентина, Америка йыр-моңдары менән таныштырҙы. Өс сәғәтлек «ике бүлектән торған сәйәхәт» тыуған ерҙә – тәүҙә ҡурайҙа үҙенсәлекле итеп уйнау, һуңынан «Йыуаса» композицияһы менән тамамланды, тип хәбәр иттеләр коллективтың матбуғат хеҙмәтенән.

Ошо уҡ программаны 7 февралдә Башҡорт дәүләт опера һәм балет театры сәхнәһендә ҡарарға мөмкин.

«Башинформ» мәғлүмәт агентлығы