Новости

28.05.2020

Башҡортостандан Луганск өлкәһенә генерал Миңлеғәле Шайморатов иҫтәлегенә автоуҙыш ойошторола

29 майҙа Ҡырмыҫҡалы районы Шайморат ауылынан легендар 112-се Башҡорт атлы дивизияһы командиры Миңлеғәле Шайморатов иҫтәлегенә автоуҙыш башлана.

Автоуҙышта ҡатнашыусылар кавалерия дивизияһы байраҡтары күсермәләрен тапшырыу, Миңлеғәле Шайморатов мемориалына һәләк булған һалдаттарҙың табличкаларын ҡуйыу, шулай уҡ аллеяла эрбет үҫентеләре ултыртыу өсөн Луганск өлкәһе Изварино пунктына тиклем барып етергә ниәтләй.

Акцияны үткәреүгә рухландырыусы – яҙыусы, журналист, «Несокрушимая и легендарная 112-я…» китабы авторы Борис Малородов.

Сараны Башҡортостан Республикаһы Дәүләт Йыйылышы – Ҡоролтай депутаты Салауат Харрасов, «Аҡтау» социаль яраҡлаштырыу үҙәге, «Төнгө бүреләр» байкерҙар клубы  ойоштора.

Автоуҙыш иртәнге сәғәт 11-ҙә башлана.

«Башинформ» мәғлүмәт агентлығы